---
20 Yanvara aid sherler

Qanli 20 Yanvar
---
Şəhidlər

Qatil gülləsinə qurban gedirkən,
Gözünü sabaha dikdi Şəhidlər.
Üçrəngli bayrağı öz qanlarıyla,
Vətən torpağına çəkdi Şəhidlər...

Zalım öyünməsin zülümləriylə,
Min bir böhtanıyla, min bir şəriylə.
Həqiqət uğrunda ölümləriylə,
Ölümü kamına çəkdi Şəhidlər...

O şənbə gecəsi, o qətl günü,-
Mümkünə döndərdik çox namümkünü,
Xalqın qəlbindəki qorxu mülkünü,
O gecə dağıdıb sökdü Şəhidlər...

Tarixi yaşadıb diləyimizdə,
Bir yumruğa döndük o gecə bizdə.
Yıxıb köləliyi ürəyimizdə
Cəsarət mülkünü tikdi Şəhidlər...

Onlar susdurulan haqqı dindirər,
Qaraca torpağı qiymətləndirər.
Donan vicdanları qeyrətləndirər,
Axı, el qeyrəti çəkdi Şəhidlər...

Bilirik, bu bəla nə ilkdi, nə son,
Ölürkən uğrunda bu Ana yurdun.
Quzu cildindəki o qoca qurdun,
Doğru, düz cildini çəkdi Şəhidlər...

Dözdü hər zillətə, dözdü hər şeyə,
Dünyada mənimdə haqqım var - deyə
Kütləni xalq edən müqaviləyə,
Qanıyla qolunu çəkdi Şəhidlər...

İnsan insan olur öz hünəriylə.
Millət, millət olur xeyri, şəriylə,
Torpağın bağrına cəsədləriylə,
Azadlıq tumunu əkdi Şəhidlər.


ALLAH bütün Şəhidlərə Rəhmət eləsin...!!!
(Bəxtiyar Vahabzadə)

Qanli 20 Yanvara Aid Sherler
---
On doqquz yanvarda doğum evləri
Ölümdən, qırğından xəbərsiz idi.
O gün Bakımızda axşamdan bəri,
Ölüm ilə həyat üzbəüz idi.

Güllə səslərini çağa səsləri,
Batırdı o gecə, şükür allaha!
Doldu şəhidlərin boşalan yeri,
Naşükür olmayaq, vallah, bir daha!

Gedən oğulların, axan qanların,
Əvəzi su səpdi yanan qəlbimə,
O şənbə gecəsi doğulanların,
Onundan doqquzu oğlanmış demə.

Zalimin zəfəri başdan qələtdir,
Zamanın səsini biz də dinlərik.
Dünya gücümüzə yaxşı bələddir,
Hələ biçilməmiş əkilənlərik!


Mart, iyun 1990
Bakı – Şəki (Bəxtiyar Vahabzadə)

Qanlı Yanvara
Müəllif: sekineilyasqizi | 19 Yanvar 2011

20 Yanvarda yağan güllələr
Möhtəşəm Azadlıq sözünə dəydi.
İstini soyutdu,odu söndürdü,
Neçə gur ocağın közünə dəydi.

Cəlladtək tarixdə iz saldı adı,
Qana susamışdı,qandan doymadı;
Aldı taqətini,tutar qoymadı,
Ata-anaların dizinə dəydi.

Bilindi insanın yaxşı-yamanı,
Cavan gəlinlərin itdi gümanı,
Çökdü çöhrələrə nisgil dumanı,
Məsum balaların üzünə dəydi.

Azmoldu murazı gözündə qalan?
Azmoldu əlləri dizində qalan?
Faxralı elindən-tələbə olan
Qəhrəman İlqarın gözünə dəydi.

Ölmədi igidlik,öldü igidlər,
Yıxıldı zülmətdən çəkilən sədlər;
Tələ qurmuşdular xisləti bədlər,
Sonuncu zərbəsi özünə dəydi.

20 YANVAR ŞƏHİDLƏRİ - ŞEİRBax gör necə aludə olub qanə şəhidlər, Şahid gedəcək bu gecə Qur`ana şəhidlər!

Bax gör necə aludə olub qanə şəhidlər,
Şahid gedəcək bu gecə Qurana şəhidlər!

Sübhdən çıxalı evlə vida eyləməyən var,
Tanrım, sönə düşmənin evindəki çıraqlar!
Güllə səsi tutmuş bu gecə xeyli qulaqlar
Bir-bir tökülür xəzreyi ümmanə şəhidlər!

Kaş ki, Bakıda ol gecə al qanı görəydin,
Asfalta yıxılmış neçə cavanı görəydin,
Əlində tutmuş əsləhə şeytanı görəydin,
Onda bilərdin ki, yetir canə şəhidlər!

Bəzi ananın tək çırağı söndü o axşam,
Şəhidlər necə hicr oduna yandı o axşam,
Hürriyəti insan balası dandı o axşam,
Zülfünə çəkib qırmızı şanə şəhidlər!

Ovundura bilməz bir nəfər şəhid atasın,
Yadına salar İbrahimin kuhi minasın,
Əflakə çəkər ahu fəqan darı nəvasın
Qəlblər soyulur hər gecə viranə şəhidlər!

Şəhid anası gəzmə belə gül sorağında,
Hicranə yanırsan qalırsan gül fərağında,
Baş əymədilər ol yağı düşmən qabağında,
Zülm olsada can verdilər mərdanə şəhidlər!

Oldu Bakıda Kərbibəla tufanı Allah!
Ağlamağ olub millətimin hər anı Allah!
Güllər səpilib yollara minlər sanı Allah!
Göz yaşı axır guşeyi xiyabana şəhidlər!

Yaz Dost Əli ol qəmli-kədərli gecələrdə,
Göz yaşlı ürək odlu qəhərli gecələrdə,
Zülm ilə keçən qarə zəhərli gecələrdə,
Bil daxili cənnətdi rizvanə şəhidlər!

20 yanvar hadisələrinin iştirakçısı Qarabağda şəhid olmuş Dost Əli (İmişli)
20 Yanavara aid 20 il evvel yazilmish sher
Bir qalanın sirri kimi
Sirli oldu qanlı gecə.
“Humanist” “Qızıl ordu”nu
Ürəklərdən sildi necə...
Quduz canavarlar kimi
Qıcıdaraq dişlərini,
Yeridi şəhər üstünə,
Yeridi insan üstünə.
Silahları sağa-sola,
Yerə-göyə fırlatdılar.
Qarşısına çıxanlara -
Qoca, cavan, körpə uşaq,
Canlı-cansız demədilər,
Gördüklərin məhv etdilər,
Ərşə qalxdı nalə səsi,
Ana!” səsi, “Kömək!” səsi...
“Bala!” - deyib ayaqyalın
Küçələrə qaçana bax!
“Bakı yanır!” harayıyla
Tez özünü yola atan
Ataya bax, oğula bax.
Vətən, gəldim!” harayıyla
Evdən çıxan o ərə bax!
Arxasınca nalə çəkən,
Həyatını məhv eyləyən
Sədaqətli gəlinə bax!
“Aman Allah!” deyə-deyə
Küçələrdə qaçana bax!
Arxasınca açılacaq
“Alabəzək“ güllələrdən
Xəbərdardır bu qaçanlar,
“Ordumuzu”, vəhşiliyi
Görüb qaçdı, bu qaçanlar,
Hər tərəfdən güllələrlə
Qarşılaşdı bu qaçanlar.
Küçələrdə izi qaldı,
Səkilərdə izi qaldı,
Ürəklərdə közü qaldı
qaçanların.
Neçə-neçə oğlu qaldı,
Neçə-neçə qızı qaldı
Əliyalın qaçanların.
Adı Azərbaycan ilə
Birgə qaldı qaçanların.
Eyvanlarda duranlara,
Evlərində gəzənlərə,
Güllə atan tanklara bax,
Yolda durub sinəsini
Quduzların tanklarına
Sipər edən igidlərə,
ərlərə bax!
Yaxşı baxın, bir də baxın!
Koroğlular, Cavanşirlər
Yetişdirən yurda bax!
Azğınlaşmış “Qızıl ordu”
Bir cəhənnəm yaratdı, bax.
Qandan göllər yaratdı, bax!
Bakımızın ürəyində
Qanlar axdı igidlərdən.
Sanki Bakı cana gəldi,
Sinəsindən damar-damar
axan qandan.
Azərbaycan ürəyindən
axan qandan.
Ona baxın, yaxşı baxın!
İgid cırıb yaxasını
Durur tankın qarşısında,
“Yol vermərəm
tapdayasan torpağımı!”
Tankı sürən bir an durur,
Gözlərindən qəzəb yağır.
“Oğlandakı hünərə bax,
cürətə bax?”
Göz qırpmadan
qıcıdıb dişlərini
İrəliyə hücum çəkir.
“Vətən!”, “Anam Azərbaycan!”
Son sözlərin deyən oldu.
Bu igidim, bu eloğlum.
Xırçım-xırçım xırçımladı,
Sızım-sızım sızıldadı,
Gizil-gizil gizildədi,
Tırtılların arasında
İgidimin sümükləri.
Axdı isti qızıl qanı
Soyuq asfalt üzərinə.
O, məhv oldu, həlak oldu
Deməyin siz bu igidə.
Bir göyərçin olub uçdu
Azərbaycan göylərinə.
Bir idisə, min-min olub
Girdi yanar ürəklərə.
Şəhid kimi, qardaş kimi,
Sirdaş kimi, oğul kimi
Yaşayacaq böyüklərin,
Kiçiklərin dillərində.
Yetişəcək, böyüyəcək
Anaların o bətnində.
Doğulacaq igidlərim.
Bir körpənin qədəmində,
Bir göyərçin uçuşunda,
Qərənfilin ləçəyində
Yaşayacaq igidlərim,
Şəhidlərim, şəhidlərim!

GÜLSÜM
09.02.1990
Sherlerin ardi olacaq
---
Anarim.Az
---

Anarim.Az

Sayt Rehberliyi ile Elaqe

Saytdan Istifade Qaydalari

Anarim.Az 2004-2023