Gulmeli Letifeler Toplusu

Letifeler ashagidaki herflere gore qruplashdrilib

1-9  Ç  Ə  İ  Ö  Ü 

BELƏ QƏLƏTLƏR ELƏMƏYƏSƏN Movzusunda Letife

Günlərin birində yenə də Molla işdən yorğun-arğın gəlir. Arvad qabağına bir stəkan çay töküb qoyur. Molla da əlində çubuq istirahətlə əyləşib gözünü dikir ocağın üstündəki qazana. Arvad yavaş-yavaş axşam xörəyini yemək üçün hazırlıq görməyə başlayır. Birdən qapı döyülür. Molla öz-özünə hirslənir ki, yenə görəsən kimdi bu dar vaxtı
gəlib çıxdı. Bir tikə bozbaşımız var, qoymayacaqlar vaxtında yeyək. Qapını döyəndə ki, nəfəs almadan elə döyür. Molla neçə dəfə səslənib, qapıdakının kim olduğunu soruşursa da heç bir cavab çıxmır.
Axırda arvad deyir:
– A kişi, ölmürsən ki? Dur bir gör kimdir də...
Molla deyir:
– Arvad, vallah, heç bu pilləkənləri düşüb çıxmağa ərdəmim gəlmir.
Nə olar, sən get gör kimdir?
Arvad deyir:
– A kişi, bəs sən heç utanmazsan ki,sən kişi xeylağı dura-dura, mən arvad xeylağı qapıya gedəm?
Axırda Molla naəlac qalıb, ürəyində söyə-söyə durur, pilləkənləri düşüb qapını açır. Baxır ki, qapını döyən bir nəfər seyiddir. Hirs vurur
Mollanın başına. Soruşur ki:
– Nə var? Nə istəyirsən?
Seyid yaltaqlana-yaltaqlana deyir:
– Seyidəm, cəddim hörmətinə bir pay istəyirəm.
Molla elə hirslənir ki, ağlı başından çıxır. Hirsini saxlaya bilməyib çığırır onun üstünə ki:
– Bəs səhərdən deyirəm kimdi, kimdi, niyə cavab vermirsən?
Seyid deyir:
– Dedim, elə özün zəhmət çəkib gələsən. Bəlkə yerin də oldu, bu gecə qonaq saxlamağa.
Molla baxır ki, bu lap həyasız seyidlərdəndi. Deyir:
– Nə? Onda dalımca gəl!
Molla düşür qabağa. Seyid də onun dalınca pilləkənlərdən çıxırlar yuxarıya. Elə ki seyid lap evin qapısına çatır, Molla dönüb deyir:
– Hə, Allah versin qardaş! Nə çörəyimiz var, nə də yerimiz.
Seyid deyir:
– Bəs indi ki yox idi, məni bir də bura niyə çıxardırdın? Elə qapıda deyəydin də!..
Molla deyir:
– Dedim, özün bir zəhmət çəkib, məni bu pilləkənlərdən düşürdüb çıxartdığın kimi, çıxıb təzədən düşəsən, dadın görəsən, bir də belə qələtlər eləmiyəsən.
- anarim.az - in Letifeler Toplusu Bolumu

Letifeler Toplusu




Anarim.Az

Sayt Rehberliyi ile Elaqe

Saytdan Istifade Qaydalari

Anarim.Az 2004-2023