Dostlarından biri bir gün söhbət əsnasında Molladan soruşur:
– Molla, sənin neçə yaşın olar?
Molla deyir:
– Qırx tamamdı.
Bu işdən on-on beş il keçir. Bir gün bir məclisdə yenə də yaş üstündə
söhbət düşür. Hərə öz yaşını deyir. Molla da tez aralığa atılıb
deyir:
– Mənim bu il qırx yaşım tamam olur.
Mollanın haman dostu da burada imiş. Bu sözü eşidib deyir:
– Ay Molla, mən on il bundan qabaq eşitdim ki, sənin qırx yaşın
var. İndi də deyirsən qırx yaşındasan, bu, necə olur?
Molla deyir:
Hə də... Bunun necəsi yoxdu ki, qırxdı də...
Dostu soruşur ki:
– Yaxşı, sən elə həmişə qırx yaşında olacaqsan?
Molla deyir:
– Əlbəttə. Kişinin sözü bir olar. Bir dəfə dedim qırx, qurtardı getdi.