Günlərin birində Molla gücünü biləyinə yığıb bir ev tikdirmək istəyir.
Tanışlar hərəsi gəlib öz məsləhətini deyir. Molla da heç kəsin
ürəyini sındırmayıb hamının göstərişini qəbul eləyir. Ev tikilib
qurtarır. Ortalığa elə qəribə bir şey çıxır ki, evdən başqa hər şeyə oxşayır.
Ev hazır olandan sonra Molla təzə evdə bir qonaqlıq verib, haman
adamların hamısını çağırır. Elə ki, hamı yığılır, Molla soruşur:
– Hə, necədi. Ev xoşunuza gəlirmi?
Hərə burnunu bir tərəfə çevirib, dodağını sallayır. Heç kəsin xoşuna
gəlmədiyini görən Molla deyir:
– Bu, sizin istədiyiniz evdi ki, heç birinizin xoşuna gəlmədi. İndi
bu dəfə siz qıfıllanın, mən öz ağlımla tikdirim, görün ev necə olar.